3. EKARPENA - Sare sozialak

Sare sozialei buruzko bideo bat:

Hautatzearen zergatia:

Sekulako arrakasta dute gaur egun sare sozialek gazteen (eta neurri txikiago batean, hain gazte ez direnen artean ere) artean. Pil-pilean dagoen gaia iruditzen zait eta nire iritzia eskaintzeko aproposa dela uste dut.

Ekarpena:

Hasteko, aitortu beharra daukat ez naizela sare sozialak erabili zalea, aspalditik dudan Messengerraz, eta egin berri dudan Twitterraz aparte, ezpaitaukak ez Tuenti, ez Facebook, ez My Space, edo antzekorik. Honek galdera bat sortzen du nire barruan: pertsona "arraroa" naiz sare sozial hauek ez erabiltzeagatik? Hala erabiltzaileak dira arraroak?

Ez naiz arraroa nor den eztabaidatzen edo argudiatzen hasiko, baina egia esan behar badut, ez diot funtzio beharrezkorik ikusten halako sare sozialak edukitzeari. Agian ez dudalako edo probatu ez dudalako izango da, baina hori iruditzen zait behintzat. Azkenean aurrez-aurreko harremanak edukitzen ere ahaztu egingo zaigu, dena ordenagailu bidez egingo dugu eta. Ez hori bakarrik, dendari baten aurrean nola jokatu ez dugu jakingo, gustoko norbait aurrean dugunean ez dugu jakingo nola ligatu berarekin, ... azken finean komunikatzeko dugun hain baliabide itzela galtzea ekar lezake, hizkuntza. Noski, ez dugu hitz egiteko gaitasuna galduko, ez da hain dramatikoa izango, baina niri aberatsagoa iruditzen zait jendearekin aurrez-aurre gelditzea, taberna batean izan, frontoi batean izan, hondartzan edota mendian. 

Sare sozialak erabiltzen gero eta adin txikiagoan hasten da jendea, eta gaztetxo hauen erabilera kontrolatu ezean, arriskutsu bihur liteke itxuran ederra eta dibertigarria dirudien mundua. Gurasoek ahal den neurrian esku hartu behar dute seme-alaben interneteko kontuetan, arazorik gerta ez dadin. Gainera, sare sozialetan mundu osoko jendearekin jar zaitezke harremanetan (onuraz beteta dagoen ezaugarria iruditzen zait) eta zoritxarrez mundu guztian ez da euskeraz egiten, beraz euskeraren erabilera ere modu batean baztertu egiten da. 

Garbi dagoena zera da, ongi erabili ezkero, oso baliabide bikaina direla Tuenti, Facebook edo My Space bezalako sare sozialak, baina mundua ez da hor amaitzen.


Egilea: Ioritz Arrondo Begiristain 

2. EKARPENA - Teknologiaren bilakaera eskolan

Hona hemen Youtuben aurkitu dudan bideo bat:

Hautatzearen zergatia:

Teknologiak eskolan izan duen bilakaeraren zati batek niri ere eragin dit orain 17 urte eskolan hasi nintzenetik hona, eta beraz bideo interesgarria iruditu zait.

Ekarpena:

Aspaldi izan zela ematen du, baina orain dela urte gutxi batzuk ordenagailu edo telebistarik ez zen eskolan. Egunerokotasunean liburuak, kuadernoak, arkatzak eta borragomak, tiza batekin idazten zen arbela, ... erabiltzen genituen eskolan. Gaur egun arrotza dirudi ikasle eta irakasleek tresna hauek erabiltzea, baina agian orain urte gutxi eskolan hasi berria den haur batentzat bakarrik. Lehen liburuak zirenak orain ordenagailuak dira, kuadernoak blogak, arkatzak eta borragomak teklatu eta saguek ordezkatu dituzte, eta arbelek eskoletan jarraitzen dute, baina orain behatzarekin soilik maneiatu daitezke. Nik orain dela 8 urte amaitu nuen Lehen Hezkuntza, eta oraindik gogoan dut hiru pertsonen artean mugitzea kostatzen zitzaigun telebista pisutsu hura, eta DVD-a orduantxe hasi berria zenez, gehienean VHS-a erabiltzen genuen. 12 urte beranduago besterik ez, eta DVD-ak zahar gelditzen ari dira, VHS-ak zer esanik ez. Orain telebista saguari klik bat eginez eskura daukagu interneten, eta bideoak behatzak baino txikiagoak diren "pen drive"-etan dauzkagu. 

Aldaketa guzti hau 20-25 urte ditugun gazteok nabaritu badugu, gure gurasoek are eta aldaketa sakonagoak bizi izan dituzte. Gu aldaketa guzti honen prozesuan egon garenez, teknologia berrietara moldatu ahal izan gara, eta gure gurasoak ere batzuk gehiago, besteak gutxiago, baina aparatu berriak erabiltzeko gai dira. Baina zer pasatuko litzateke hemendik urte batzuetara eskolan dauden haurrek klaseak berriro ordenagailurik eta telebistarik gabe emango balituzkete? Baina, tira, alferrikako galdera bat dela uste dut, garaiak aldatzen doaz eta liburu eta kuadernoak ahazten joan beharko gara... ala ez?


Egilea: Ioritz Arrondo Begiristain

1. EKARPENA - Teknologia berriak ezinduen zerbitzura

Artikulua: http://www.zientzia.net/artikulua.asp?Artik_kod=12575

Hautatzearen zergatia:

Konturatu gaitezen hain erabiliak diren aparatu elektronikoak erabiltzeko zailtasunak dituzten pertsonak ere badaudela, eta haiek ere teknologiaren munduan barneratu nahi dutela eta horretarako aukera izan behar dutela.

Ekarpena:

Ezintasun fisikoren bat duten pertsonak gutxiengo bat dira, baina horrek ez du esan nahi gainontzekoak baino gutxiago direla. Zorionez ezintasun fisikorik gabe jaio naiz ni, baina nork daki etorkizunean hori aldatuko den edo ez; horretan pentsatzen jarrita artikulu honetara iritsi naiz eta une batez ezindu hauen lekuan jartzen saiatu naiz. Izan ere, orain hain erraz egin ditzakedan hainbat eguneroko gauza, telebista katea aldatzea esaterako, behatzak mugitzeko gaitasuna galduko banu egin ezingo nukeen zerbait izango litzateke etxean bakarrik banengo une horretan. Beraz, oso garrantzitsua eta beharrezkoa iruditzen zait ezindu fisikoen bizitza gainontzekoon ahalik eta antzekoena izan dadin teknologia aparatuak egokitzea.

Telebistak gure bizitzan garrantzia handia badu, zer esanik ez ordenagailuek. Pentsatze hutsak ordenagailua maneiatu ezin izateak, ardura sortzen du nire buruan. Saguaren botoiak ezin sakatu, ezin ezer idatzi teklatuan, ... eta horrek denak suposatzen duena, murgildu ezin gintezkeen interneten mundu ikaragarria. Gaur egun internetarekin edozer gauza egin liteke, beraz saiatu behar gara denon eskura izaten halako baliabide garrantzitsua. Zoritxarrez, merkatuan dauden egokitutako aparatu elektronikoen prezioa oso altua da oraindik ere, eta prezio horiekin aparatu hauek eskuratzea zaila bada lehendik ere, pentsa gaur egungo krisi egoerarekin eta lanik gabe dagoen jende pilarentzat zer nolako oztopoa den. Badirudi ezinduentzat dena oztopoak direla honelako gauzak egiterako  edo lortzeko orduan, horrexegatik COMPORTA proiektuan lanean dabiltzanak goraipatu nahiko nituzke, gizarte zabal batentzat egiten ari diren aurrerapenengatik. Izan ere, agian orain ez dugu horrelako tresnen beharrik eskuak libre mugitzen ditugunok, baina zer egin etorkizunean hatzek garunaren aginduak jasotzen ez badituzte?

Egilea: Ioritz Arrondo Begiristain